David Bowie arishi küm 69 nung süogo

January 11, 2016: British nunger nüngtugu kentener aser kenzülur, David Bowie, cancer tashitak den miima raraba sülen Deobar aonung arishi küm 69 nung alima nungi pilaogo.

Pa akumli mapang pai “Heroes”, “Fame” aser “Life on Mars” ken densema ken tajung aika tena liasü.

Pa tasoba anogomung amongba sülen anogo ana lir pa alima nungi pilar lir.

Pa indang website nung sangdong ka ajanga, “David Bowie ita 18 tashi cancer tashitak den miima raraa aruba sülen tanü par kinüngertem lia kanga süngjema alima nungi pilaogo,” ta metetdaktsü.

Twitter ajanga Bowie’er jabaso film director Duncan Jones-ia iba osang jangjashija, “Iba ya atangji, ta kanga tejashi nung ashir. Ni khenpigabo offline alitsü. Nenok ajak meimer,” ta ashi.

Twitter ajanga asür nem akhüm agüja British Ato kilonser David Cameron-i, “Pop kentener nüngtugu David Bowie indang ken angaa aser repranga ni intet. Tanaben purapitetba nung pa mongin ka liasü, aser pai temsüa inyak. Kanga takoksa tulu,” ta ashi.

Osang ajanga angazükba agi, Dawid indang single ken ‘Lazarus’ December ita tom nung sayaa liasü, aser iba ken nung pai pa asütsü indang pai shinzüka lir.

Bowie shitakba tenüngbo David Robert Jones lir. Pa South London nung January 8, 1947 nü aso aser pa akumli mapang pai kensep 25 tashi adoka sayaogo, iba den külemi pai film aika nung shilem agiogo.

Bowie-i pa kinüngtsü model, Iman den jabaso Duncan aser jala Alexandria ‘Lexie’ Zahra Jones nunger toktsür alima nungi pilaogo.