David Bowie bilemtetba kenten sentong Skype nung reprangtettsü

March 29, 2016: New York nung David Bowie bilemtetba kenten sentong nung arua medentetertemi sentong tagidak nung Skype ajanga reprangtettsü, ta sentong ayongertemi sangdong ka ajanga metetdaktsüogo.

Mezüngbuba kenten sentongji March 31 nü Carnegie Hall, New York City nung akatsü aser tanabuba sentongji April 1 nü Radio City Music Hall nung akatsü.

Skype nung iba sentong reprangnertem dang nungi kentener teloktemi yariba timtemertem nem teyari agütsütsü asoshi tenla tera agitsü.

“Radio City nung akatsü aliba David Bowie memorial kenten sentong asoshi tejangrar aika aliba yong alima ajak nung iba sentong tagidak nung sayutsü atema onoki Skype aser Ammado na den loktep aser iba melena tereprangertem nungi tenla tera agitsü,” ta official site sangdong nung shia lir.

“Onoki nisung shia dang nungi tajemba agi sen dollar 20 (pound 15) agitsü. Tang tashi nung iba teyari agitsü metetdakja aliba telok tasentemji Pixies, Blondie, Michael Stipe, J Mascis, The Flaming Lips, Patti Smith aser Mumford & Sons nunger lir. Iba sentong nung mapang talangka Bowie indang producer inyaksang Tony Visconti-a adentsü,” ta sangdong ajangasa ashi.

Mezüngbuba sentong indang ticket January 12, 2016 nü adok ajisüaka gondha ana majung tsüngda yokma-a dok. Iba sülen ano tanaben menünga sen dollar 3,000 agi yokdar. Ano tanabuba sentong atema adokba ticket tema adoker gondha ishika tsüngda nung yokma.

Bowie January 10 nü asüba sülen nüburtemi pa nem tetushi tulu agütsüba sentongsa agia aruogo. Grammy award sentong nunga Lady Gaga-i pa nüngtem nung kanga junga shilem agiogo. Ano Brit Awards sentong nung Lorde-i pa bilemteta ‘Life on Mars’ ken tentsü. Iba den külemi ano taküm June ita nung Glastonbury benjung nunga pa bilemtetba sentong ka akatsü.