David Bowie küm 70 ajungba mong nung kenten sentong alitsü

November 16, 2016: Sangküm asür, David Bowie küm 70 ajungba anogomung nung pa indang taküm otsü aser pa mapatem sayatsü aser alima tesem aika nung pa nüngtem nung kenten sentong balala ayongzüka akatsü.
Item sentong nung nüngtugu kentenertem, pa den inyaksemertem aser par medemertemi pa nem akhüm agütsütsü.
Sangküm January ita nung pa sür küm ka ajungbamong amongtsü aser iba mapang nung pa nüngtem nung kenten sentong 70 dak tema akatsü.
Pa asüba sülen Los Angeles aser San Francisco na nung densema pa nüngtem nung kenten sentong aika ayonga kaogo, aser item sentong jagi ajungmesoa Gary Oldman, Seal, Ewan McGregor aser Talking Heads’ Jerry Harrison nunger densema kentener aikati pa nem tetushi agütsütsü.
Ano Lady Gaga aser Lorde na densema nüngtugu kentener aikati pa nüngtem nung kenten sentong kaogo.
Sangküm pa asoba anogomung nung ‘Child 44’ star Gary Oldman-i anir London kenten sentong nung shilem agitsü.
Taküm February ita nung Bowie atema Gary Oldman-i 2016 Brit Awards mapang Icon Award agizükja liasü.
Kasa sentong nung Bowie’er telok nung züngsemtem- Mike Garson, Earl Slick, Adrian Belew, Sterling Campbell, Holly Palmer aser Catherine Russell nungeria shilem agitsü aser iba kenten sentong nungi ajangzükba sen ajakji Children & The Arts Charity nem tenla agütsütsü.
David Bowie-i pa indang kensep ‘BlackStar’ sayaba sülen anogo ana dang lir pa 2016, January 10 nü asü. Pa ita 18 tashi cancer tashidak den raraa liasü.