David Ferrer-i 2015 Malaysian Open takok marok agizüker

Kuala Lumpur, October 04 (Agencies): Spain nunger David Ferrer-i final asaya koka Malaysia Open asayamong tebur singles takok marok tanü Deobar nü agizükogo.
Tan asayamong nung temaba jenjang abensang, Ferrer-i tanü points 7-5 7-5 ngua külem sensopur, Feliciano Lopez final asaya nung tsükdaktsü.
World No. 8, Ferrer-i tan agizükba densema tennis asayatsü tenzüker tanü tashi nung takok marok 25 buba agizüker lir.
Ferrer-i tan takok anguba jakdang Qatar, Rio aser Mexico nunger nunga takok ngua taküm 2015 küm shilem agiba asayamong 4 prongla indang takok marok agizükba osang jangjaogo.
“Taküm 2015 küm ya ni atema takokba küm ya lir kechiyong ni shilem agiba asayamong 4 prongla indang final asaya nung ni takok nguogo,” ta tanü takok marok den külemi, senpet sena dollar sen 170,600 agizüksang, Ferrer-i metetdaktsü.
Tennis asayar mongintem, Rafael Nadal, Andy Murray, Novak Djokovic aser Roger Federer nunger sülen anidaka, Ferrer-i tan agi Tour jenjang indang final asaya 50 buba nung shilem agir lir.
Ano külen, Philippines nunger Treat Huey aser Finland nunger Henri Kontinen nati points 7-6 (7/4), 6-2 agi South Africa nunger Raven Klaasen aser America nunger Rajeev Ram na madak final asaya koka tenati tebur doubles shilem indang takok marok agizüka liasü.

You must be logged in to post a comment Login