David Gilmour-i Pink Floyd tanaben melungjemner

August 13, 2015: Pink Floyd kentener telok nungi David Gilmour, Roger Waters, Rick Wright aser Nick Mason nunger 2005 küm ajurutepa Live 8 concert agüja liasü.

2008 küm par telok nungi Rick Wright asüba bilemteta 2014 küm parnoki kensep nung kodanga meinokba ken ishika bendena ‘The Endless River’ kensep adok.

Aji oda süaka Gilmour-ibo pa atema joko Pink Floyd ji ojang, ta ashir.

“Nibo joko ojang. Ni Pink Floyd nung küm 48 denogo. Iba küm 48 tsüngda noklang nung shilem 95 tashi ken ajanga kanga jangratema aser pelatepa liogo….ni ibaji meraksaner. Anünga aliba noklang nung shilem pongu jagi ni bilemba menembangdaktsüner. Tang iba telok tenzükshinungbo jilo air ka mesüka akümtsü aser Rick meli-i tenzüktsübaji tai ama nibo bilemer,” ta U.K. radio station, Classic Rock den jembiba mapang ashi.

“Roger-i inyakba ajak nung nia pu asemer aser pai inyakba agi pa-a pelar…saka ni tanaben meyipa maotsü. Joko tenüng ka kübok kecha meinyakner. Ni inyaknüba ajak inyaktsüji ni temeten lir…,” Hau tangari Pink Floyd sentongji mereprangiang malitsü ajisüaka aji kü khuret masü. Ni asoshibo iba ya nisung pezüi inyakba ajanga olung ana mepiladaktsüi ayuba mapa amai lir. Ibai kentener telok ka dang lir. Ni joko ibai maginer aser tanaben oa adentsü nüngdak mali,” ta paisa ashi.