David Warner-i Allan Border medal kümna buba angu

Sydney, January 24(Agencies): Hombarnü Australia nunger opening batsman David Warner-i küm anabuba Allan Border Medal atonga nguogo. Iba sempet asoshi tetoktepertem captain Steve Smith aser Mitchell Starc na liasü.
Tang tashi nung Ricky Ponting, Shane Watson aser Michael Clarke nungeri ang iba sempet atonga ngua lir.
Arishi küm 33 tain Warner-i vote 269 angu. Smith aser Mitchell Starc-i 248 aser 197 vote angu.
Iba sempet agütsütsü nisungji parnok külem asayartem, osangbenertem aser umpire temi shimer.
Australia team vice-captain-i maneni one-day international asayar tajungtiba sempet angu aser Starc-i Test nung asayar tajungtiba sempet angu.
Shane Watson-i küm asem atonga Twenty20 medal agizük. Pai run 298 azük aser wicket 9 agi. Pa indang strike rate 150.51 liasü.
“Kü team-mate aser Steve Smith, nenok ajak dang kanga pelar. Nenok medeni ni iba jenjang metongtetla, aser maneni onok sapurtem danga kanga pelar,” ta Sydney nung iba sentong nung sempet agizükdang Warner-i ashi.
Brett Lee-i 2008 küm test asayar award agizükba sülen, fast bowler rongnungi test asayar tajungtiba award tangang Starc-i agizüker.
Western Australia nungi all-rounder Hilton Cartwright-i Bradman young cricketer sempet agizük.