Davis Cup: India aser Pakistan na Nur-Sultan nung asayatsü

New Delhi, Yimpoksüi/November 19 (Agencies): Pakistan temepishiba mangai International Tennis Federation (ITF)-i Mongolbarnü India aser Pakistan na tsüngda taruba Davis Cup atema Kazakhstan yimtiba Nur-Sultan shimogo.
ITF Davis Cup Committee-i November 4 nü neutral venue kati iba asayamung belener aotsü telemtetba agiba dak sendakba nung Pakistan Tennis Federation (PTF)-i temepishiba ka benoka liasü.
PTF-i ashiba agi, India nunger temeshi aine aortemi security tsütsü kecha tetsükdaktsü makai Pakistan semdangtetra kechiba Indian team Islamabad nung masayatettsü. Ajisüaka world governing body-i iba asayamung neutral venue ka nungdang asayatsü telemtetba agiogo.
“Pakistan Tennis Federation (PTF)-i Islamabad nungi asayamung belener aotsü atema Davis Cup Committee-i telemtetba agiba asadangshitsü asoshi mepeshia liasü. Independent tribunal kati November 18 nü asadangba sülen parnok temepishiba magizük,” ta ITF sangdong ka ajanga metetdaktsü.
“Maneni PTF-i neutral venue ka nominate masütsü asoshi telemtetba agiba sülen Davis Cup Committee-i Kazakhstan yimtiba Nur-Sultan, National Tennis Centre nung November 29 nungi 30 tashi iba asayamung asayatsü lemtetogo,” ta kasa sangdong nung shia lir.
Asayatem ajak indoor nung asayatsü kechiyong kanga temokong asüba ajanga kima masayatettsü.
“Indoor nung asayaba ajanga onok asayartem ajangzüktsü. Onok asayartemi grass nung masayateter ta masü saka parnoki hard courts nung tayongba asayateter. Weather condition kanga majung aser indoor nung asayaaka iba ajanga temang nung kongshitsü,” ta India coach Zeeshan Ali-i ashi.
India-i iba asayamung atema asayartem sangdongogo. Asayartem rongnung kija asaya nung Sumit Nagal aser Ramkumar Ramanathan aser asayar tejen Paes aser Jeevan Nedunchezhiyan na tarep asaya nung shilem agitsü imlar.
Tarep asayar Rohan Bopanna Hombarnü tapu yiruba sülen iba asayamung nung shilem magitettsüsa kümogo.
Kasa mapang nung ITF-i Islamabad nungi belener oa neutral venue ka nung iba asayamung asayatsü atema telemtetba agiba atema Pakistan nunger tarep asayar Aisam ul Haq Qureshi-i Hombarnü pa iba asayamung nung shilem magitsü ta shiogo.
Aisam ya Pakistan nunger rongnungi asayar tajungtiba rongnung ka lir aser pai Hombarnü Instagram ajanga pai iba telemtetba agiba jangjatsüogo aser ashiba agi, Islamabad nung mesera pa masayatsü.