Dawid asoshi ki ka – T.Ken 132:11-18.

Tsüngremi chuba Dawid dang pa ki ka asütsü memela. Iba melen Tsüngremi Dawid asoshi ki ka sütsü. Tsüngremi ashi, “Dawid, ni ne temang asoshi ki ka mesütsütsü saka nübur asoshi ki ka sütsütsü. Idakji na nungi jakzükba ka teti Israel chuba menden nung alitsü”.
Pai ano Dawid chirtem asoshi langka ashi, “Ne jabasotemi kü tezüngzüktepba aser kü kulitem koba Ni parnok dang sayutsü aji benshidi süra parnok jabasotem ne chuba menden nung teti mendaktsütsü. Kechiyong Kibubai Zion Pa talidak asütsü Pai aji aginü”. (t.12,13). Idagi Tsüngrem chirtem asoshi teinyaktsü ka lir. Pai alima meyangludang Khrista nung asenok shimtet (Ef1:4) Yisui ashi, “Nenoki ni shim masü saka ni nenok shim” (Yn15:16). Koda Temeshi maongka tulu !
Asenok Tsüngrem chirtem asütsü shimtetta liasü. “Temeimbatem, dang asenok Tsüngrem chirtem lir, aser tesü asenok kechi asütsü ano jungkai madok. Pa jungkai adokdang asenok pa ama asütsü, kechiaser Pa komama lir aji oda asenoki pa angutsü, aji asenoki metet”. (1Yn 3:2). Koda tesüngmangtsü tajaba! Pauli ashir asenoki taküm nung yimsü asütsü (Rom 5:17). Tsüngremi asenoki taküm nung chuba ama yimsü südaktsüner.
Asenoki tashi angaba aser temeshiba ajanga yimsü asür. Tsüngremi pa sentsüwangshi asoshi asenoki temeshiba nung yimsü südaktsüner. Kechiaser Yisu Khrista nung tamang ajanga asenok pa chirtem lir, asenok kotak nung Khrista den amen. Anungji asenoki tekümtet sopudi. Asenok tepela asoshi ayimtendi.
Kenü tamangertemi Khrista den pa yimli nung yimsü asütsü. Saka tanü pai taküm nung yimsü asütsü na aginer. Nai Khrista den yimsü asür asü? Nai Tsüngrem o nung tashi angadang aser ne mulungjang merüka ayudang,na chuba ka akümer.Taküm nung ne tanelaren teküpbok jenjang nung teli. Chuba ka süang.