Dawood Ibrahim aser Saeed na bushiba nung US-i India yaritsü

New Delhi, Rongjui/September 07 (Agencies): Telungpur tetsüti aser 1993 küm Mumbai nung bomb aika pokdakja amakba nung tongti aibelensang, Dawood Ibrahim aser 26/11 Mumbai amakba asalentong yanglusang, JuD tongti Hafiz Saeed na bushiba nung United States-i India yaritsü melungogo.
Yashi US aser India natisa ‘Communications, Compatibility, Security Agreement (COMCASA)’ tezüngzüktep agi aser arrtsü adena kiralongraba, India NSG züngsem akumtsü aser H1B visa onüktem nunga o lemtepa liasü.
Yashi External Affairs Minister Sushma Swaraj, Defence Minister Nirmala Sitharaman, US Secretary of State, Michael R. Pompeo aser Secretary of Defense James N. Mattis nunger tsüngda senden amen aser linük anapronglai Pakistan dang tanga linüktem nung kiralongratsü atema par litsü mamshidaktsütsü mepishi.
Parnokisa Pakistan dang Mumbai, Pathankot aser Uri densema arrtsü adener amakba nung aibelenertem nem tim temerenshi agutsütsü mepishi.
US-isa Pakistan dang par linük nung kiralongrar telok balala jenokdaktsüba anema inyaktsü aser parnok indang networks raksajang ta mepishitsü melungogo.
Tan hopta tetenzüklen Pentagon-i US Congress dang Coalition Support Fund (CSF) asoshi Pakistan nem sen million $300 agutsüba meyipa reprangshitsü asüngdang, kechiyong Pakistan-i US South Asia Strategy pu-masemer.
US-isa, JuD chief Hafiz Saeed-i kiralongra maneni inyakaka Pakistan-i pa jenokdaktsür, ta ashi. 2014 küm US-i Saeed ya foreign terrorist organisation ka lir, ta sangdonga pa apuba mesüra tepsetba atema senpet US sen million 10 agutsütsü sangdonga liasü.