DB Tech-i 25buba batch skill training programme tenzükogo

Dimapur, Monupii/May 26 (Agencies): Mapa mengui alir lanurtem atema tanü Don Bosco Tech AIDA Centre, Dimapur nung 25buba batch asoshi skill development training programme tenzükogo.
Iba sentong nung tongti tejaoker, Pritpal Kaur, IPS-i, iba institute-i mapa manguba lanurtem asoshi iba maongka agutsüba atema pelaba metetdaktsü.
Training agirtem ajungshia lai, tangari ashiba mangatsüla saka nü melungjagi jembiba angang, kecha tamakoktsü mali, ta ashi.
“Nai jangraba sülen anidakang, tamakok-a angutsüa akok saka nai tamakok nungi angazükbaji nü takok asutsü. Tamakoktemji taküm nung ‘speed breaker’ dang lir,” ta Kaur-i ashi.
Tetushi tejaoker Holy Cross, Dimapur nung Parish Priest, Rev. Fr. P. J. Thomas-ia training agirtem dang takok angutsü atema mapa meranga inyaktsü ajungshi.
Kasa sentong nung AIDA Executive Director aser Don Bosco Tech province coordinator, Bro. Sunny Joseph-i Nagaland nung DB Tech indang mapatem tongmelang agi metetdaktsüdang pai, iba institute-i nisung 1600 nem training agutsüogo aser parnok rongnungi 1500 bo mapa balala aser company balala nung inyakdar, ta metetdaktsü.
Training agir rongnungia nisung kati pai training course agidang ajangshiba lemsatepa liasü; kasa sentong nung Yimchunger sobaliba yartsüngsang, Sumi sobaliba ken, tanüasüng sobaliba ken aser Nepali ken tena shilem agia liasü.
Iba sentong tembangba sülen tsüraburtem aser staff tem telongjem senden amen, aser iba mapang nung tsüraburtem dang training inyakyim indang metetdaktsü.
Iba institute nung hospitality – food & beverage service aser assistant beauty therapist indang training agutsür.