DBC convocation sentong agi

Dimapur, Rongchii/April 12 (TYO): Discipleship Bible College (DBC) indang 36buba aser 19buba FTPNEI convocation sentong ya Hokulbarnü DBC auditorium nung agiogo, kong Kohima Ao Baptist Arogo nungi senior pastor, Rev. M Asangba Longkumer ya tongti o jembir liasü.
Ministry balala nung bendanga agütsür inyakba arogo lennir ka nüngtem nung kaketshirtem nem sempet agüja liasü.
Sentong nung jembiba mapang Rev. Asangbai ashiba agi, Tsüngrem nütsüng ka ama aseni inyaktsü mapaji Yisu Khrista indang osangtajung sangdongtsü ya lir. Asenok sadoksayima aliba toktsür nüngdakba nüburtem den yariteptsüla. Khrista dak amanger ajak ya metongjemi aliba nütsüng dang Tsüngrem osang proktsü yok.
Pai graduate asürtem dang Tsüngremi ajaba langzüa tangar ajungmesor kaka asütsüsa bendanga agütsür nokdaktsü ajungshia liasü.
Iba sentong nung tepela o ya DBC Principal, Asso. Prof. S. Wati ajanga jembi aser EBC Principal Rev. Dr. Thungdemo-i Tsüngrem temoatsü meshia sarasadem.
DBC nungi kaketshir ajak agi parnok 125 graduate asü. Parnok rongnung Bachelor of Theology angur kaketshir 42, Master of Divinity, DBC Program renemer nisung ana, Master of Divinity FTPNEI (DBC) renemer 39, Master of Divinity FTPNI (EBC) renemer 26 aser Master of Divinity, FTPNEI (SBC) renemer 16 liasü.