DBC nung M.Div 31 aser B.Th 48 renemogo

May 12 nü  Discipleship Bible College nung Y. Nuklu Phom-i o jembidang agiba noksa angur.

Dimapur, May 12 (TYO) : Taküm 2017 küm Discipleship Bible College (DBC), Dimapur nung azünger laishir ajak agi 79 renemogo. Parnok rongnung M. Div renember laishir 31 aser B.Th renemer nisung 48 liasü.
Taküm agi DBC nung 34 buba Convocation Hokolbar nü parnok college nung aliba sentong nunng tongti o jembir, Phom Baptist Church Association nung Executive Secretary, Y.Nuklu Phom-i jembidang, tanü Naga lima nung temenen mapatem züiner saka asenoki itemji temenen mapatem ama mebilemer aser alima japujari aser tim masüba mapatem nem asenok atsür odaktsüdagi ta tekümdangtsü o ka metetdaktsü.
Tanü putu nung asenoki Tsüngrem o sayuba aser jembiba yimya ya meyipba reprangdangtsü nüngdaker, kechiyong arogo nung tesayurtem o nübortem na tsüngda tazüngla tuluka adoka, iba amaji yimten nunga government nung alirtem o nübortem na tsüngda tazüng angur. Iba ama tazünglaji meyutsüi nübortem dang kotak indang dang masü saka alima nung alidang kotak nung alir mesüka alitsüsa tangatetba shitak agütsütsü nüngdaker ta nüngtugu arogo lenir aser sayutsüngir Y.Nuklu Phom-isa metetdaktsü.
Tanü asen lima nung nisung ajaki ochimashi mapatem anema jembir saka nisung kari ochimashi mapatemji anema nokdakra, ano meyiper itemjiang aitsür. Tetezü nübortemi ochimashi mapatem anema jembiaka ochimashi mapatem maneni inyakner ta paisa tesasaba olen ka metetdaktsü.
Nagaland nung tang Clean Election asoshi arogo aser lokti tentettemi meranga inyaker saka karibo iba mapajia menütsür aser makoktsü ta ashir, tetezü onokibo ochimashi mapa teinyaktsübasa, onokbo memelenshitsü ta ashiba den kasa lir ta Nuklu Phom-isa metetdaktsü.
Item tensa tia ajakji kokteta nübortem lenmang shitakleni anitettsü asoshi Tsüngrem mapa inyakertem dak tanüla temeshi ain tashi alitsüla aser iba putu ya Tsüngremer ainkar adokba putu asütsüla ta paisa laishirtem ayongzük
Iba kasa sentong nungsa DBC Principal, Rev.O.Alemi jembidang, Naga lima nung 1970s küm tanüla temeshi milak tulu aluagi asentenshi tulu adoka nübortem temulung meyipa Tsüngrem mapa inyaknüba aser samaa aliba tanülatem anir arutsü jangraba ajanga iba BC ya lapok ta metetdaktsü.. Iba nükjidongji DBC nung züngtetter laishirtemi ataloktsütsü imlar ta paisa metetdaktsü.
Taküm 2017 küm DBC nung züngtettertem rongnung arogo, school aser tesem balala nung Tsüngrem tenzüktsü purtem aika telemtetba agir liasü. Item rongnung Nepal, Arunachal aser Assam nung inyaktsü purtema lir.
Tanü DBC nung graduate asürtem rongnung maparen tapu balala nung tangar dang nungi tajungba inyaktettertem nem sempet tapu balala agüja liasü. Item sempettemji Rev.Dr.E.W.Clarck Discipleship Award, Rev.I.Longri Ao Peace Award, Rev.A.Riküm Scripture Award, Rev.J.Onen Ao Servant-Leadership Award, Rev.Lano Longchar Evangelism Award, J.N.Aier Music Award, Dr.S.Impang Jamir Best Citizen Award, Rev.R.Waimeren Christian Ministry Award, Rev.Dr.T.Alemmeren Mission Award, Dignity of Labor Award aser D.Haralu Academic Proficiency Prize nungertem liasü.
Iba sentong ya DBC nung tesayur Assistant Profeesor, Kilang Longkumeri anir aser graduate asürtem tenüng nung M.Div renemertem rongnungi Imnasenla Longkumeri jembia liasü.