DBC nung mezüng D.Min & M.Div  degree agütsü

Discipleship Bible College, Dimapur nung mezüng D.Min aser  M.Div renemertem den tongti o jembir Rev. Dr. Wati Longchar aser DBC nung tesayur aser ketdangsertem noksa nung angur ( Dimapur, June 29, 2023).

Dimapur, June 29 (TYO) : Discipleship Bible College (DBC) nung tanü Doctor of Ministry renemer nisung 6  aser Master of Divinity renemer nisung ana nem degree agütsüba sentong tajung ka ayongzüka liogo.

Item laishirtem azüngba sentong ya Programme for Theology and Cultures in Asia aser DBC na longjemer inyakba sentong ka liasü. M.Div yabo Distance Education sentong ka lir.

Tanü iba sentong nung tongti o jembir, Rev.Dr.Wati Longchar liasü. Pa ya DBC nung Doctor of Ministry azüngba maparen nung Consultant  aser ano FTESEA, USA nunga Executive Director lir.

Tanü DBC nung  D.Min renemer par trok aser M.Div renemer parnok ana nem pei azüngba nung takok anguba yari Doctorate aser Master degree agütsüba mapang Rev.Dr.Wati Longchar den Dean of D.Min Studies Dr.Imsenperong aser Dean of M.Div. Distance Education Dr.Takayaba nungertemi shilem agia liasü.

Iba sentong nung DBC Board of Governors nung mendenbuba Dr.T.Lima Jamiri tepela o jembi aser Associate Prof.Dr.Alem Sangtami lai azüng. Iba sentong tenzüka DBC Academic Dean Dr. Husazulu Chuzho-i sarasadem aser laishirtem rongnung teburtemi ken tajung ka tenloktsü.