DBC Sunday Sept. 11, 2016.

–  Rev. O. Alem
Principal, Discipleship Bible College.

Yisu Khrista taochi, Tebu Tsüngrem temeim aser Tanela Temeshi ain tenüng nung arogo pur ajak nem salem agütsür.
Aor Baptist Arogo otsü nung Aor Tsüngrem den tesendaktep otsüji  tesüngmangtsüka lir. Item rongnung: Mezüngbuba nung,Tsüngrem temeimi Ao lima bushia aruba otsü. Abenjagi, Aor taküm otsü kotaker taküm nung züngsemtsü maongka angu. Anungji Aori Tsüngrem dang tepela salaba nüngo mapa ka inyak: “Naga Limai Osangtajung arur Küm Noklang Ka Ajungba tenüng nung ABAM-i Clark Theological College tenzük. Aji oda Tsüngremia shilua moaja arur.
Tanabuba nung, meyi ka noklang tugu netter terok küm, Ao lima nung Osangtajung metsü meiteter küm noklang ka sür pezübuba  nung , Tanela Temeshi Tsüngrem temeimi Ao limasa bushia aru. Tan yabo balaka liasu: “Asentenshi Tulu” adokdaktsü. Iba ajanga Tsüngrem den tesendaktep adokdaktsüba yabo ano tesüngmangtsü rongnunga balaka liasü. Tatsüba agi, Tsüngrem Tanela Temeshi temeim agi Aor mulung yimsadakja kotaker taküm agi asangsang taküm nung kongshiba metet dang, mejembitet tepela manentet; iba metsü mesamai maneni kadaktsünü Tanela tajungshiba tulu agi, Dimapur nung “Discipleship Bible College” tenzük. Discipleship Bible College (DBC) ya Naga Limai Tanela Temeshi asentenshi aruba senmang lir. Shinübaji, Aor Khristantemi Theological College ana lapok, anapronglaji Tsüngremer senmang. Ka arogoi lapok aser kajiTanela Temeshi ain agi kongshirtem amangba purtemi lapok. Helleluya Kasem tenüng sangdi !
Discipleship Bible College 1981 küm tenzük, tesem meshiteta sarasadem dang, iba tesem dang “Mount Miracle” ta ajatsü Tsüngremi jembi.Iba küm nungi tenzüka tang tashi nung DBC nungi Tsüngrem tenzükertem aika adokogo. DBC anepalutsüsa International Evangelistic Fellowship (IEF) telok moatsüba asoshi Tsüngrem tenüng sangdi aser parnok den külemi sarasadema asenok ajaki meranga inyakdi.
Taküm küm DBC nung azünger ajak agi 240 jungogo. Ajisüaka, timtem kaji parnok laishirtem alitsü ki peria maka aser tesayurtem asoshia talikdak ki peria maka. Anungji, item rongdak nüngdaktem inyaktsü asoshi, Ao Baptist Arogo Mungdang (ABAM) dang mepishiba ama,tan September ita terka Deobar (11th Sept. 2011) anogo temoatsü sentep nung sarasadem den temulunger tenla bendena agütsütsü telemtetba agiba asoshi Tsüngrem tenüng sanga Ao Baptist Arogotem ajak dang mulungbena pelaba lemsateper. Iba tenla ya ajanga putu aika asoshi Tsüngremer nükjidong ataloka inyaktettsü tamang akar. Iba tangatetba nung Ao Baptist Arogotem nung toklang tenzükertemi anir Tanela Temeshi temeimi kongshiba nütsüng nebortem tanur tain ajaki pelashishia pei pei tamang yari shilem agitsü ayongzüker, Ajemalua agütsüdi. “Tashi dak alia tenlaba” (2 Kor.8:3) tanela tain tangatetba agi agütsütsü aser Tsüngrem mulung chidaktsütsü ajungshitepdi.
International Evangelistic Fellowship (IEF) aser DBC nung inyakertem aser azünger ajak tenüng nung Tsüngrem temeim salem agütsür.