DC Kohima-i FoodWiFi food delivery app sayatsü

Kohima, Chiteni/July 10 (TYO): Deputy Commissioner, Kohima, B. Henok Buchem, NCS-i Brehostibarnü Kohima nung pa indang office nung FoodWiFi food delivery app sayatsüogo, koba local businesses yaritsü aser Nagaland nung employment opportunities adokdaktsütsü nükjidong nung state nung yangluba digital sapang ka sayaba alitsü.

DC Kohima-i iba sentong nung jembidang entrepreneurship ya kanga tongtipang lir aser tanü sayaba app ya kanga nüngdaka aliba ka lir ta ashi.

Public sector nung maongka kanga ajema akumer, anungji lanurtemi entrepreneurship, innovation aser self-employment lenmang bushia inyaktsüla, ta pai ayongzük.

Iba sentong nung FoodWiFi CEO Anato Sema-i iba sapang indang mangdang lemsatep aser Nagaland nung züngser aser mazüng aliba lanurtem ajangzüktsüsa sectors balala nung sen lenmang arutsü maongka agütsütsü nükjidong nung iba mera ya agia tenzük, ta ashi.

FoodWiFi nükjidong ya tangalen nungi arua state nung chiyongtsü bener arua agütsüba sapang tem lapoka aliba temelen agütsütsü asoshi lir, ta pai ashi.

Iba sapang yagi Nagaland indang rongsenketzüng tashi itshitsü meranger, kechiaser business, employment aser revenue ajanga state telungzük nung alitsü aser kasa mapang local restaurants, vendors, delivery partners aser entrepreneurs tem yaritsü, ta ashi.

FoodWiFi yagi customers nem anisüngzük agütsüba kisüng masü saka rongsenketzüng tajangzük Nagaland telungzük nung alitsüsa sustainable local ecosystem yangerba nung yaritsü imlar, ta Sema-i ashi.