DC Kohima-i mapang shidak nung lenmang tem yanglushitsü tuyur

Dimapur, Mongputeni/Oct. 09 (TYO): Deputy Commissioner Kohima, B. Henok Buchem, NCS-i department aser agency balala dang Kohima jila telungzük nung lenmang raksar aliba tekeraba nung yanglutsü totuyuba agütsüogo aser Kohima nung pa indang office chamber nung October 8, 2026 nü senden amendang züngzüktepba ama mapang shidak nung item mapa renemtsü metetdaktsü.

Iba senden nung Phizo Hill Junction nungi Keyake (BSF Camp) tashi, DBS Junction, Ziekezou nungi Keyake (BSF Camp) tashi NH-150, aser DBS Junction, Ziekezou nungi Medical College Junction, Phrieba tashi lenmangtem asadanga osang agitepa liasü.

Item lenmang nung ali atsüoka aiba densema lenmang majungba mechi lenmang nung senzürtem lendongi yoker aser timtem balala ajuru ta jembia liasü.

Iba mapang Urban Development Department-i DBS Junction, Ziekezou-Medical College Junction, Phrieba stretch aser Phizo Hill Junction-Keyake (BSF Camp) lenmang yanglushiba maparen ya November 2026 tashinung renemtsü ta ashi.

Department dang ali tulu atsüoka aiba tesem nung tekeraba nung mera agia gari senzütettsüsa yanglutsü aser teti asoshi lenmang junga yanglutsü sentong renemtsü metetdaktsü.

DBS Junction, Ziekezou nungi Keyake (BSF Camp) tashi NH-150 dak sendakba nung chainage Km 6.200 aser Km 6.650 tsüngta sinking zone yanglutsü atema proposal agütsüba Ministry of Road Transport and Highways (MoRTH)-i agizükogo ta NPWD (National Highways) ajanga metetdaktsü. Ajisüaka Ministry ajanga sen agütsüba nung ajemdaker mapa tenzüktsü ta ashi.

Department-isa lenmang anepaluba mapa tang teinyakdak lir aser iba stretch nung October 2026 tatem tashinung gari senzütettsü imlar ta ashi.

Iba senden nung Keyake (BSF Camp) Junction lenmang yanglushiba indanga asadang aser National Highways and Infrastructure Development Corporation Limited (NHIDCL) dang November ita tanabuba hopta tashinung gari senzütettsüsa yanglutsü shia liasü.

NH-2 nung Phesama nung sinking zone dak sendakba nung kasa mapang tashinung heavy motor vehicles (HMVs) senzütettsüsa yanglutsü NHIDCL nem totuyuba agütsüogo.

NPWD (Roads and Bridges)-i Kezoma-Kidima-Pudunamei nung gari senzüteter ta senden nung metetdaktsü.

Kohima Village Youth Organisation, P Khel Youth Organisation aser D Khel Youth Organisation ajanga yimtsüng lenmang nung gari tulu aika senzüba tebilemtsü lemsatep aser iba ama gari senzüba ajanga tang tamshidak lenmang tem tamajungba kumdaktsür aser yimdaklir nem timtem jenti agütsür ta ashi.

Lanur lokti tentet temi department aser agency tem dang gari tulutem yimtsüng lenmang mamshidaktsütsü aser akok tashi National Highways nung senzüdaktsütsü ajungshia liasü.

Phesama aser Phizo Hill Junction-Keyake (BSF Camp) stretch nung sinking zones yangluba sülen ang gari tulutem yimdak lenmangtem nung mesenzüdaktsütsü, ta Senior Superintendent of Police, Kohima, Krodi Rhetso, IPS-i ashi.

Lenmang majung alibatem junga anepalu masüba asoshi DC Buchem-i temulung masüba lemsatep aser senden nung züngzüktepba ama mapang shidak nung renemtsü totuyuba agüja liasü.

Paisa departments aser agencies tem dang October 16, 2026 tashinung item mapa inyakba osang metetdaktsütsü shia liasü.

Iba senden nung Senior Superintendent of Police, Kohima; District Administration, District Land Revenue, Kohima Traffic Police, NPWD (National Highways), NPWD (Roads and Bridges), Urban Development Department aser NHIDCL nungi ketdangsürtem; Kohima Village Youth Organisation, P Khel Youth Organisation aser D Khel Youth Organisation nungi lenirtem aser contractors tem dena liasü.