DCC lenirtemi NPCC Tir, K Therie ajuru

Dimapur, November 28 (TYO): Dimapur nungi Congress Party officials- DCC Dimapur, ACCCs, DMCC, AMCC, DDYC & Minority Cell nungi lenirtemi November 27, 2017 nü Dimapur nung NPCC Tir, K. Theri ajurua taruba 2018 State General Election atema o lemtepa liasü, ta Dimapur DCC Tir, Dietho Rhakho-i sangdong ka ajanga metetdaktsü.
Iba senden nung, tang NPF-i aniba DAN sorkar aser District MLA temi Dimapur District kanga mejungi sendoka yutsüba onüktem nung o lemtepa liasü.
Dimapur District ya shishilembaba tiyongtsü ka lir aser India tongti den sendakteptsü atema kikümbang ka lir, ajisüaka iba district sendoka yutsüba ajanga, light junga marur, lenmang kanga majung, tesem kar nung tzü kanga metsünger, aputem chireper, rongsenkettsüng aser commerce jenjang tamajungba akumer aser ozüng alema benshirtemi tanen makai amokmerener. Anungji Dimapur sensotem kümzüktsü atema tashitait lenirtem shimtsü nüngdak, shirnok dak Dimapur District terenlok atema mangdang tajung lir, ta sangdong nungsa shia lir.
Dimapur District Congress Committee aser frontals ajaki NPCC Tir, K. Therie dang Dimapur District nungi tokteptsü mepishir; Dimapur district ajungtsü atema pai atangji takok angutsü atema DDCC-i mera ajak agia inyaktsü, ta parnokisa metetdaktsü.