DCC Mkg-i nisung apuba sashia aitsür

Mokokchung, Rongchii/April 27 (TYO): Rongchii 22, 2018 nü Tuensang district kübok Helipong anasa prangpong amer telok kati Tuensang-i totzü belenba Oil Tanker gari anisang den handyman apubaji District Congress Committee, Mokokchung-i sashia aitsür, ta tanü DCC Mokokchung Tir, Watimongba aser tongti tezülur (Admn), P.Aley nati sangdong ka nung metetdaktsü.
Nisung apubaji ajanga oil supplying companies- Essar, Indian Oil, Assam Oil, NRL-i Sangtennü (Mongolbar) nungi tenzüka longkak aita Mokokchung, Tuensang, Zunheboto aser Longling nung totzü ayokba outlets shibanger.
Mk District Headquarter nung yashi nungi tenzüka totzü ayokba outlets shibanger. Rongchii 25 nü Ongpangkong Petrol Pump Coop. society-i tezüluba nung tim ketdangsertem dang ghonda 24 tsüngda nisungtemji angutsü tuyu saka tamakok angu. Ibaji ajanga Mokokchung jila nung nüburtem kanga timtemer, ta sangdong nung shia lir.
Talisa Bus aser Taxi agi anüngba ajanga anasa aliba yimtsüngtem aser jila temeket nung alirtem shishilembatsü aser shiranger anepalutsü atema jilai maruteter, ta parnokisa metetdaktsü.
“Talisa college aser school tanurtem mejungi kongshiogo, iba denji külemi totzü black nung ayokertemi iba tensa nungi maongka agidar. Iba timtem ya maneni ora nüngdakba osettsüset/chiyungtsütem nung jenjang kanga atutsü,” ta sangdong nung shia lir.
“Anungji DCC, Mkg-i prangpong amer teloki mapa tamajung inyakba aitsüba den külemi sorkar dang oil tanker gari amshirtemji tekaraba nung bushitsü aser aibelenertemji puteta sangdonga tim ozüng nung ajemdaker temerenshi agutsütsü akhanger. Sorkar tsütsü menoa meinyakba mesüra tamakok ngura ibaji sorkar tashimait asütsü,” ta DCC, Mkg-isa metetdaktsü.