DCCI, BAN, EDBA aser CCCTA Media Cell ajanga metetdaktsür

Dimapur, July 27 (TYO) : Dimapur district nung shishilembartemi tentetba telok pezü – Dimapur Chamber of Commerce and Industry (DCCI), Business Association of Nagas (BAN), East Dimapur Business Association (EDBA), aser Chumukedima Chamber of Commerce and Trade Association (CCCTA) nungertemi akhangba atema Kilo Affairs, GPRN/NSCN-i shidi ka ajanga Kahoto Zhimo aser Solomon L. Awomi na indang ken o reprangshimtsü ta nangzükogo, ta DCCI, BAN, EDBA aser CCCTA Media Cell sangdong ka nung metetdaktsü.
Nübortem asoshi sorkar ka asübayong, nübortemi aginüba ama Kahoto Zhimo aser Solomon L. Awomi na den Bond Agreement agiba reprangshimtsü, ta Kilo Affairs, GPRN/NSCN-i agütsüba shidi nung shia lir.
Kahoto aser Solomon na mapang balala nung Khehoi HQ nung puok aser tenangzükba agiba tezüluba nung sign südaktsüba sülen ang tena chiok, saka item tenangzüktep agibaji shishilembartemi magizüker.
July 19, 2015 nü Kahoto Zhimo züka merenshiba sülen DCCI, BAN, EDBA aser CCCTA nungertemi July 28, 2015 tashi nung ‘Bond agreement’ anaprong meyipa agitsüla ta GPRN/NSCN nem takhangba agüja liasü.
GPRN/NSCN-i shishilembartem dang masü saka public-i aginüba angatetba asoshi kanga pelar. Anungji ACAUT Nagaland-i Kahoto Zhimo nem GPRN/NSCN-i Bond Agreement südaktsüba anema FIR benoka aliba meyipa agitsü mepishir, ta Media Cell sangdong ajanga metetdaktsüogo.
GPRN/NSCN-i lenji arua inyakba atema kanga pelar saka parnoki iba tenangzükba meyipa agira, DCCI, BAN, EDBA aser CCCTA nungertemi mokdangba sentong ayongzüka agitsü, ta Media Cell sangdong nungsa shia lir.