DCCI, BAN, EDBA & CCCTA-i NSCN-K aitsür Anogo 15 tsüngda L Doulo khasettsü merangertem aputsü akhanger

Dimapur, September 19 (TYO): NSCN-K züngsemtemi Kuda Cold Storage kibur L Doulo tepsettsü merangba mapa khukhua aitsür ta DCCI, BAN, EDBA aser CCCTA külem sangdong ka nung metetdaktsü.
NSCN-K-i Dimapur nung tensa raksatsüogo aser shishilembartemi iba atema ola madoki malitsü. L Doulo ya shishilembar tejen ka lir aser tesüiba küm tenem tashi pai mapa inyaka aruba ajanga lanur entrepreneurs aika ajungmesogo, ta sangdong nungsa shia lir.
Tayongzükba aser tetsükdaktsü aika ajuruaka, pai 2004 küm cold storage industry nung tetsüng ajemoka mapa inyaktsü tenzük. Pa ya kanga dang ajemalu aser o tanüp jembiba nisung ka lir saka iba ama nisung ka taküm agitsü merangbaji mamangteter, ta Dimapur Chamber of Commerce & Industries(DCCI) Tir, Akashe Zhimomi, Business Association of Nagas(BAN) Tir, Thungbemo Murry, East Dimapur Business Association(EDBA) Tir, Solomon Awomi aser Chumukedima Chamber of Commerce & Trade Association(CCCTA) Tir, Avi Chase nungertem sangdong nung ashi.
Maneni, kasa teloki küm ka nung yearly commercial tax anaben tashi kasa nisung dang meshibaji kangasa mebilemdangi inyakba mapa ka lir. Iba ama ozüng alema mapa inyakertemi shishilembartem aser public nem tetsübu tia bener arutsütsü meranger aser parnokji tangsatang aputsüla aser ozüng tapet agi merenshitsüla, ta shishilembartemisa takhangba agütsü.
Ozüng amertemi anogo 15 tsüngda L Doulo taküm agitsü merangertem aputsü mapang latettsür aser iba mapang parnok pua marura, onoki kechi junger ta bilemer ibaji inyaktsü, ta DCCI, BAN, EDBA aser CCCTA-isa metetdaktsü.