DCCI, BAN, EDBA & CCCTA-i teyariteper ajak dang pelar July 26 tashi nung telangzüba agütsütsü akhanger

Dimapur, July 22 (TYO) : Bodbarnü Dimapur jila nungi Chumukedima jila tashi temulungertemi dokan shibangba mapa takok tulu ngua inyakogo, ta Dimapur Chamber of Commerce & Industry (DCCI), Business Association of Nagas (BAN), East Dimapur Business Association (EDBA) aser Chumukedima Chamber of Commerce & Trade Association (CCCTA) külem sangdong ka nung metetdaktsü.
Temulungertemi dang dokan shibangtsü ayongzük saka shishilembar ajak longjemer sentong takok ngudaktsüba atema nenok ajak dang kanga pelar, ta sangdong nungsa shia lir.
Iba inyakyim ya tejashi sayutsü atema agiogo aser July 26, 2015 tashi nung takhangba agüja aliba asoshi mapa meinyakra, mokdangba sentong tuluba nung agitsü, ta DCCI, BAN, EDBA aser CCCTA sangdong nungsa shia lir.
Telok pezüi akhangba rongnung mezüngbubaji, GPRN/NSCN-i Kahoto Zhimo aser EDBA tir Solomon L. Awomi na den tenangzüktep agia aliba meyipa agitsüla kechiyong tenangzükba anaprongji amokmerena agidaktsüba lir.
Tanabuba nung, Capt. Hutoshe linük tenzükba wadang nungi anentsütsü aser tasembuba nung July 19 nü tashiyim mapa inyakertem state sorkari aputsü akhanger.
Dokan shibanga lungkak aitba ajanga public nem timtem bener arutsüba atema sasa bilemer saka iba ama tensa ka nung public aser mulungtet teloktemi onok den yariteptsü mepishir, kechiyong iba ama mapa tamajung ya nisung mashi ka dak inyaktsü akok, ta DCCI, BAN, EDBA aser CCCTA-isa metetdaktsü.