DCCI-i kaketshirtem posemer; Mokdangba magizüker

Dimapur, June 5, (TYO): Dimapur Chamber of Commerce and Industry (DCCI)-i All Nagaland College Students’ Union (ANCSU)-i inyakba mapa anema menokdaker saka kaketshirtemi DCCI den asüngdangya kecha mesüi mokdangtsü ayongba atema ang ola adok.
DCCI-i shishilembartem aser talirtem asoshi bilemja osang metetdaktsü. Mapang telatet makai mokdang ayongba ajanga shishilembartem dang masü saka nisung ajaki timtem ajurutsü, ta Media Affairs sangdong ka nung ashi.
Scholarship tim mesüi amshiba ajanga takoksa anguba kaketshirtem asoshi onoki bilemtsür aser parnoki inyakba mapa posema nungiter. State sorkari kaketshirtem dak tashiyim mapa inyakba aitsür aser iba tatalokba atema sasa bilemer. State sorkari yamai tashiyim mapa inyakba ajanga tarutsü putu dang kechi sayunür ta onok ratar. Sorkari kaketshirtemi aremzüka aser akhümtsübua inyaktsüla kechiyong parnok ya asen tarutsü lir, ta DCCI-isa metetdaktsü.
Eid benjung amungba Muslim shishilembartemi tanü dokantem melapok saka tanüngba shishilembartemi akhi ama dokantem lapoka shishilembaogo. Yaritepba aser longjema lir ta sayuba atema DCCI-i ajak dang pelaba metetdaktsür, ta Media Affairs-i ashi.
Tarutsü nunga shishilembartemi social media aser olulu nung masü saka DCCI official tetuyubatem sülen anidaktsü metetdaktsür. Maneni, administration aser Dimapur police-i yaritepba atema pelaba shisemer, ta Media Affairs-isa metetdaktsü.