DCCI-i NSCN (IM) nem tenüngsang agütsür; Tanüngba NPG tem ayongzüker

Dimapur, November 30 (TYO) : November 20, 2015 nü NSCN (IM)-i MIP ajanga osangkakettem nung departments/regional authorities mesüra kija shingaia tenla mesarutsü tetuyuba agütsüba pelashishia agizüker, ta Dimapur Chamber of Commerce & Industry (DCCI)-i sangdong ka nung metetdaktsü.

Dimapur nung alirtemi iba mapa pelashishia agizüker aser MIP-i sangdongba ama NSCN (IM) nung züngsem ajaki iba tetuyuba sülen anidaktsü imlar. Kasa mapang nung tanüngba Naga Yimten teloktemia benjung mapang public aser shishilembartem dang nungi sarusaji masütsü mepishir aser Dimapur kübok DCCI shishilembartem ajaki telok shinga nema saru magütsütsü ayongzüker, ta DCCI President, Hokivi Chishi-i sangdong nung shia lir.

DCCI sangdong nungsa, benjung mapang Dimapur jila nung aliba dokan kiburtemi pei dokan aser temeket nung CFL bulb enoka star tem ayutsü aser jila tobur jungdaktsütsü tetuyuba agütsüogo.