DDAPU pur fellowship agi

Dimapur, Tsüklai/Feb. 24 (TYO): Dimapur Ao Baptist Arogo (DABA), Khermahal nung Hombarnü (February 24, 2020) Dimapur District Ao Pensioners Union (DDAPU) pur fellowship ka agia liasü, kong District Hospital Dimapur nungi senior specialist, Dr. T. Temsu Lemtur tongti o jembir liasü.
Teintet rogotem ajunshiba mapang Dr. Temsu-i ashiba agi, iba lima nung teti atema kechia mali aser nisung shiai chichiba agizüka pei sasa pei dak tamang katettsüla. Pai teintet rogotem dang pei taküm nung khuret tali mebendenloki tajunglen nungi shisadanga sentong yanglur inyaktsü ajungshi.
Paisa, nisung ka temang anema alitsüla aser temang ajangzüktsüsa chiyongtsü achitsüla, ta ashiba den Laishiba nungi ‘Pela aliba mulungjangji mozü tajung saka tanüla samar aliba agi teret kongdaktsür’ ta shia aliba shin o athishia jembi.
DDAPU nung asürtem nem akhum agüja iba sentong nung minute ka mokrema ali. Iba sentong tembangba sülen teintet rogotem nem angadi mozü lema agüja liasü.