DDCA onok nung Sonia tenüng benokbaji tim masü : Chidambaram

New Delhi, Dec 20 (Agencies) : Finance Minister Arun Jaitley yaritsü meranga Centre-i Congress president Sonia Gandhi tenüng amshibaji tim masü ta taoba Finance Minister, P Chidambaram-i metetdaktsü.
Taoba UPA sorkar aliba mapang adokba ken o nung Sonia Gandhi aitsübaji tim masü aser Modi’er sorkari tebilemba tamajung yur National Herald ken o indang mapa inyaker, ta Chidambaram-i ashi.
DDCA maparen nung Serious Frauds Investigation Office (SFIO) onükji taoba Sports Minister Ajay Maken-i benok aser ibaji pa nem ken o kar agütsüba sülen inyakba lir, ta Chidambaram-isa shisem.
“Ajay Maken-i Sports Minister inyakba mapang pa dangi ken o kar aru aser itemji pai SFIO dangi aben. Ni SFIO report mangu anungji balaka mejembitettsü, saka Sonia indang tenüng amsembaji tim masü. Iba onük atema Maken-i dang telangzüba shitak agütsütettsü” ta paisa metetdaktsü.
UPA sorkar mapang BJP MP kati Sonia Gandhi den ajurutep aser parnoki pa anema inyaktsü jembitep, ta Jaitley-i osangkaket ka dang ashiba nung ajemdaker Chidambaram-i tanü iba osang metetdaktsü.
Jaitley-i MP indang tenüngji temai adoka mashi saka osangkaket jagi iba MP ji Kirti Azad liasü ta shidangogo, kechiyong Azad-i Delhi cricket telok DDCA nung ochimashi anema mapa inyak.