DDCF-i Dimapur Police & GPRN/NSCN dang pelar

Dimapur, August 7 (TYO) : Dimapur Police-i Ashish Saha tepsetba mapa nung shilem agirtem kanga kara apuba atema Dimapur District Citizens Forum (DDCF)-i tenüngsang agütsür, ta DDCF tir Joseph Lemtur-i sangdong ka nung metetdaktsü.
Dimapur Police-i kanga dang kara mapa inyakba ajanga parnoki Dimapur nung ozüng anema inyaksangshiba azüoktsü asoshi tebilemtsü khuret abenba sayur. Iba inyakyim ajanga Dimapur nung alirtemi Dimapur Police dak teimla akar aser temulung alemer, ta paisa ashi.
Ano, GPRN/NSCN-i Akato Chishi mapa nungi anentsüba atema kanga pelar, kechiyong iba ya ajanga bushisüngdangba maparen nung teyari tulu angutsü. GPRN/NSCN-i iba mapa inyakba ya tanga Naga yimten teloktem asoshia tatishitsü ka ama amshitsüla, ta DDCF sangdong nungsa shia lir.
Ashish Saha tepsetba mapa nung par kibong densema inyakba osang angazükdang kanga aoksar aser iba mapa kukua aitsür. Asen lokti nung ibala tebilemba tamajung bener alirtem aliba magizüker, ta DDCF tirisa metetdaktsüogo.