DDCF-i Dr. Aotoshi dak azükba aser Lanunukshi Pongen tepsetba aitsür

Dimapur, March 28 (TYO) : Dimapur District Citizens Forum (DDCF)-i tawa Dimapur nung Dr. Aotoshi dak Vinoka Awomi-i azükba aser memichir yimya dak maketba inyakyim agi Lanunukshi Pongen tepsetba tatalokbatem aitsür, ta DDCF Gen. Secy. A Rehman-i sangdong ka ajanga metetdaktsü.
DDCF tenüng nung DDCF Tir, Joseph Lemthur-i, ozüng ama alirtemi item tai mapa inyaker nisungtem nem tekaratiba nung temerenshi agüjang ta mepishi, kechiyong iba amala mapa tamajung inyakertem nem ozüng amertemi mapang shitak nung temerenshi magütsüba ajanga nüburtem mulungjang tetsübu agi sünga kümdaktsür, ta ashi.
DDCF-i asür Lanunukshi Pongen’er kinungertem den asüko lemsateper. Tulusang Tsüngremi nenok nem tashi tasen agüjang aser pa tanela süngjema anisüngzükdakjang ta sarasademtsür, ta kasa sangdong ajanga lemsatep.