DDCF-i taoba NEZCC Director Lipokmar Tzüdir tenüng asanger

Dimapur, January 06 (Agencies) : Dimapur District Citizens Forum (DDCF)-i tang North East Zone cultural centre (NEZCC) Director nungi mapang agi tonger anensang, Wb. Lipokmar Tzudir-i pa Director asüba mapang mapa tajung inyaktetbatem asoshi tenüngsang agütsü.
Lipokmar Tzudir ya kanga tang teyakyak nisung ka lir aser pai NEZCC ajungkettsü mechi nung North East tesem nung aliba kin aser lokti ajaki pei sobaliba agi nema tangtettsü angatetdaktsü aser ano balakata Dimapur nung aser Northeast nung aliba kin aser lokti balala den teti tesendaktep yua liasü.
Dimapur nung NEZCC amenoka atema Naga nüburtemi kanga aküm keta bilemer aser ibaji ajanga centre den tesendaktep kadaktsür.
Lipokmar-i NEZCC director mapa kanga nendaka aser bendanga agüja inyakba ajanga Naga nunger ajunga nema tangteter.
DDCF Tir Joseph N Lemtur aser Tongti Tezülur A. Rahman nati tetushi, Nagaland Angh aser Ministry of Culture, Govt. Of India nung mendenbuba, Wb. P.B Acharaya dang iba ama tensa ajak den liro medema otetba nisung, Wb. Lipokmar Tzudir-i tenzüka yutsüba maparen tembanga inyaktsü maongka agüja, balakata Regional Convention Centre aser North East Heritage Museum renema inyaktsü mechi ano mopung ka atema tanaben NEZCC, Director shimshitsü atema temepishiba ka agütsüogo.
Lipokmar nem ano maongka ka agütsü nungbo pai tali bendanga agüja inyaktsü aser ibaji ajanga Naga nüburtem tali nema tangtettsü, ta DDCF-i kanga temulung lema bilemba lemsatep.