DDCF-ia Dimapur nung ‘lease system’ magizüker

Dimapur, September 27 (TYO) : October 2016 nungi Dimapur Municipality nung tax, tolls & fees atema lease system tenzüktsü ta Municipal Affairs Department-i tetuyuba agütsüba süoki ia bilemer ta Dimapur District Citizens Forum-i sangdong nung metetdaktsü.

Taoba ita aika Dimapur nung DMC-i terenlok mapa inyaka aruba ajanga nübortem tajangzük jenti nguyonga arur. DMC-i toll aser tax saruzükba nungi terenlok mapa inyaker aser iba inyakyim nija nem agütsüba ajanga Dimapur nung terenlok mapa anentsü, ta DDCF President, Joseph Lemtur-i sangdong nung shia lir.

Anungji, bangdak department-i iba tetuyubha khen meyipa reprangshimtsü mepishir aser maneni DMC nem toll aser tax sarudaktsütsü temelaba agütsütsüla. Toll aser tax sarutsü atema DMC ket nung nübo peria lir aser sen sarutetba ajanga parnoki Dimapur nung mapa inyaktsü koka lir, ta paisa shisem.

Dimapur nung aliba Civil Societies tongtitemi sorkar tetuyuba magizüker ta ola adokba nung DDCF-ia pusema nungiter, kechiyong iba ya Dimapur nung aliba public anema lir, ta DDCF President-isa metetdaktsü.