DDCF & NLRBOA-i aitsür

Dimapur, November 17 (TYO) : November 13 nü Dimapur nung Mrs. Ritika Mehta taküm agitsü merangba mapa kukua aitsür ta Dimapur District Citizen Forum-i sangdong ka nung metetdaktsü.

Iba tatalokba nung Tsüngrem sayatenya ajanga Ritika Mehta taküm kümzükogo. Nisung kar la den mangatettep adoka lira ibala inyakyim ajanga masü saka tajunglen agi angatetteptsü merangtsüla, ta DDCF tir Joseph Lemtur-i sangdong nung shia lir.

Benjung mapang arur asü nung nisung ajaki tensa meraksaütsü mepishir aser ozüng amertem tali jeretpera alitsü ayongzüker, ta DDCF tirsa metetdaktsü.

Ano, Nyamo Lotha Road Business Owners’ Association-ia sangdong ka nung Apna Hotel kibur Ritika Mehta tepsettsü merangba inyakba aitsüogo.

La ya NLRBOA nung tatong tir inyaker. Shishilembar dak aser talisa tetsür ka dak iba mapa inyakba ya nisung ajaki aitsütsüla aser aibelener nem tapet temerenshi agütsütsüla, ta NLRBOA general secretary Khekishe Aye-i sangdong nung shia lir.