DDLSA aser Women Cell, Dimapur nati ‘legal awareness’ sentong ayongzük

Dimapur, February 21 (TYO) : Dimapur District Legal Services Authority (DDLSA) aser Women Cell, Dimapur na telungjem nung Rhododendron Hall, Chumukedima nung February 20, 2016 nü ‘legal awareness’ sentong ayonga amung aser iba sentong nung PLV, DDLSA, N. K. Keny mendenbula liasü, ta DDLSA sangdong ka ajanga metetdaktsü.
ACP ‘D’ div. Dimapur, Akum Lam-i, tanur aser tetsür temeden tsütsü ozüng tasen yangluba aser ozüng melenshiba ajak police kati meteta alitsü tim aser ozüng meteter ajaki Juvenile Justice (care & protection of children) Act, 2000 (JJA) aser Protection of Children from Sexual Offences Act, 2012 (POCSO) tem kanga junga benshitsüla kechiba süra tang tensa nung iba ya kanga nüngdaka kümogo, ta ashi.
DDLSA, Panel Lawyer, Zacharia Tetseo-i POCSO Act dak sentakba nung jembidang asen lokti nung tanur tashiyim agi raksatsüaka ola madoki mimbanga ayuba kanga zuina akümer ta kanga sasa metetdaktsü.
Panel Lawyer tem, Glory Sema, Esther K. Aye aser Limasenla Longkumer nungeria JJA Act, Immoral Traffic (prevention) Act, 1956, Motor Vehicle Act, 1988 aser Human Rights shitak amshitsü ashi. Iba den külemi police temi pua aliba nisungtem dak ozüng alema meinyaktsü, parnoki shisem.
Sentong nung police station ajak nungi SJPU züngsemtem, zonal traffic police tem aser Dimapur women cell police tem dena liasü.