DDLSA-i ayonga Bamunphukhuri nung ‘otsünu’ tetoktepba agi

Dimapur, May 07 (TYO): Tanü Dimapur District Legal services Authority (DDLSA)-i ayonga United Baptist Church, Bamunphukhuri Dimapur nung Sunday school tanurtem atema otsünu zülu (essay) tetoktepba sentong ka agiogo.
Okila jembidang DDLSA Panel Lawyer, Zacharia Tetseo-i angati legal service balala indang metetdakja liasü.
Iba dak sendakba nung pai, lokti nung tajemzükba tia nung alirtem nem angati legal teyari agütsüba aser senso ajak nem ochi temeten agütsüba indang lemsatep.
Paisa, ST/SC, nisung shibelenba takoksa ajururtem, tetsürtem aser tanurtem, küm nung income sen lakh ka tashi angurtem aser küm nung sen lakh ana dang tajemba angur teintet rogotemi (senior citizens) angati legal services agitettsü, ta metetdaktsü.
Tanü otsünu zülu tetoktepba nung Deobar school tanur parnok 27-i shilem agia liasü.
Iba tetoktepba nung mezüngbuba jenjang nung takok angulaji, Ferena Magh liasü aser la nem certificate den senpet agütsü, tanabuba aser tasembuba jenjang nung takok angurji Amenla Longkumer aser Treila Phom na liasü aser tena nema certificate den senpet agütsüogo.
Iba sentong ya DDLSA panel Lawyer, Vimeno Kutsu leniba nung agi, Sunday School tesayur, Limasungla-i lokti pelaa agizük aser United Baptist Church, Bamunpukhuri Pastor, Lahoto Aomi-i tepela anküp o jembia liasü.