DDLSA-i International Women’s Day amung

Dimapur, March 8 (TYO): March 8, 2016 nü Zutovi Village, Dhansiripar, Dimapur nung Dimapur District Legal Services Authority (DDLSA)-i “Pledge for Parity” omen nung ajemdaker International Women’s Day mungogo.
Iba sentong nung Panel Advocate, DDLSA, Livika V Sumi-i menden agi aser lai DDLSA inyakyim ashiba den taa magi-i ‘Legal Aid’ agütsüba metetdaktsü.
DDLSA Mendenbuba aser Dimapur District aser Session court nung Obendanger Neikuo Kanuo-i o jembidang, tetsürtem anogo amungtsüji kanga nüngdak, ibai anogo ya akhi anogo ka ama masü saka tetsürtem nem parnoki inyaktetba asoshi tetushi agütsüba aser akhümtsübu agütsüba anogo ka lir, ta ashi.
Tetsür ajaki ozüng kübok pei temetem angateta benshitsüla aser tetsür ajaki mela-a aliba Legal Aid maongka agitsüla, ta pai shisem.
Panel Advocates Zacharia M Tetseo, M Glory Sema aser Esther K. Aye nungeria tanur ka temeten, Lok Adalat, Tetsürtem Temeten, RTI aser Motor Vehicle Act onük tem jembi.
Olemtep mapang ‘legal aid’ maongka agitsü asoshi temetettsütem lemsatepa liasü.
Tepela o Zutovi Village, Chairman-i jembi. Iba sentong nung STH Zutovi yim aser kidanger yimtem nungi tetsürtem dena liasü.