DDMA-i NH-29 nung anentsüh aluba tesemtem semdang

Dimapur, August 25 (TYO) : Phesama aser Kigwema tsüngda NH-29 nung anentsüh timtem tamajungba kümogo aser tanü ADC Kohima, Lithrongla lenisüba nung District Disaster Management Authority (DDMA)-i iba tesem semdang.
Parnoki Phesama nung anentsüh aluba tesem semdanga Village Council züngsemtem den ajurutepa sensaksem mapang liasü.
Tang tashi nung ki 45 nung alirtemi pei talidak toktsür ogo, ta Village Council Secretary, Rovise Khale-i ketdangsertem dang ashi.
Police, Home Guards aser temeket nung aliba yimtsüngtem Viswema, Jakhama, Kigwema, Pfuchama o Mima nungertemi anentsüh aluba tesem nung ki bentokba mapa nung yariteper, ta paisa shisem.
Ano, St. Josphen’s College, Jakhama; St. Paul’s School, Phesama; Japfu Christian College, New Reserve aser anameta aliba yimtem nungi lanurtemi Phesama nungi Kigwema tashi senzüsenbongertem khu benja yariteper.
Project 72 Hrs züngsetemia iba tesem semdangogo aser teyari agütsüba den volunteers nem tzü tajemtsü agütsü.
Tanü DDMA-i takoksa ajurur nisungtem yariba kibongtem nem aser Village Council nem teyari kar agütsü.
Phesama Village Council-ia BRO, DDMA, temeket aliba yimtsüngtem aser teyariteper ajak dang kanga pelaba metetdaktsü.