DDTDWTU-i ozüng alema “Chakka Bandh” ayongzüker : Dimapur Police

Dimapur, October 6 (TYO) : Dimapur District Truck Drivers Welfare Trade Union (DDTDWTU)-i October 7, 2015 nungi “Chakka Bandh” alitsü ayongzükbaji ozüng alema lir, ta Dimapur Police-i Mongulbarnü sangdong ka nung metetdaktsü.
June 3, 2014 nü Gauhati High Court, Kohima Bench-i telok balalai temepishiba ken o 11 benokba ka danga magizük. May 31, 2012 nü Chief Secretary ajanga state sorkari transporters mesüra shishilemba dak sendakba tentet/telok kechaia state highways mesüra national highways nung office / sub-offices / information centres / welfare centres / Kiosk amala ayutsü memelar, ta tetuyuba agütsüba High Court-i pusema iba obendang agütsü, ta sangdong nungsa shia lir.
Sen / membership fees / welfare fees amala saruba ozüngi memelar aser iba mapa inyakertem ozüng kübok temerenshi alitsü ta okadaki tetuyuba agüja lir. Anungji, N.H 29 anasa Chumukedima nung DDTDWTU sub-office lapokbaji state sorkar tetuyuba anema lir.
Highway nung senzüba truck garitem anendaktsür tashiyim agi sen saruba atema nisung anaji apu, kechiyong tenati state sorkar tetuyuba anema inyak, ta Dimapur Police-isa metetdaktsü.
Anungji, DDTDWTU-i ayongzükba bandh ji ozüng alema lir aser kija mesüra telok kari danga “Chakka Bandh” atema mapa inyakra District Police-i item nisung mesüra telok ozüng tapet agi merenshitsü, ta Dimapur Police-isa metetdaktsüogo.