Debit, credit cards amshidaktsüner: RBI

Mumbai, November 12 (Agencies): Asenok nüngdaktem peritsüsa sen menüngba printing press tem nung sen jenti menüngdar, ta metetdakja tanü Honibarnü Reserve Bank of India (RBI)-i nüburtem dang bank indang kongsangtem nung nungtepba aser timtemba ajema akümtsü atema debit card aser credit cards amshidaktsüner, ta mepishiogo.
RBI-i, “Linük nung tesem 4,000 dak tema nung sen note ajak teperi renema lir, aser nüngdak peritsütsü atema bank kongsangtem item denji sentakteptsüogo,” ta ashi.
“(Onoki) Item maparen meranga inyakdang nüburtemia payment atema pre-paid cards, Rupay/Credit/Debit cards, mobile banking aser internet banking ama amshia lidaktsüner. Jan Dhan Yojana kübok banking account alirtem atema account lapoka lir aser cards agüja alibaji amshitsü mepishir,” ta RBI-i ashi.
RBI-isa, item amaji amshiba ajanga teka nung sen amshiba tebilemtsü süngjema akümtsü aser digital lima nung aliba tali shisanga akümtsü, ta ashi.
November 10 nü sen crore 10 shi transactions süogo aser nüburtem nüngdak ataloktsü atema Honibar o Deobar anogotem nunga banks aser RBI office tem lapoktsü, ta parnokisa ashi.
Sen melentsü atema December 30, 2016 tashi mapang agüja lir, ta shia RBI-i nüburtem dang, sen tejen melentsü atema mapang peria lir asünungji bank kongsangtem nung timtem ajangshitsü menüngdak, ta ashi.