Dec 11 nü tashi nung Hindi tesayurtem itasen agütsütsü

Kohima, Nov. 26 (TYO): All Nagaland Aggrieved Hindi Teachers Association (2012-13 batches)-i ayonga tanü Kohima nung Directorate of School Education nung lungkak sashia ait, saka Naga Students’ Federation (NSF) lia Directorate ketdangsertemi telangzüba tajung agüja lungkak aiter tesayurtem dang tesüiba ita pongu itasen den arrears agütsütsü atema December 11 nü tashi ataang ta ashiba ajanga lungkak aitertem süngjemogo.
Lungkak aitba sentong nung district 11 nungi Hindi tesayur merirjang ka jungnüai shilem agia tangsa itasen agütsütsüla, ta takhangba agüja liasü.
Lungkak aitertemi ‘State sorkar ya auer’, ‘Onoki sorkar sen meshir masü, (saka) onoki meranga inyaka aazükba onok meyong sen meshir’, ‘Onok takhangbatem atalokjang, ‘Tesüiba ita trok tashi nenok mejanger asü’ ta yimyim ayima liasü.
Hindi tesayurtem den jembidang NSF Edn. Sec., Imtiyapang-i, NSF-a parnok den dena lir, kechiyong tesayurtemi timtem ajangshira kaketshirtemi timtem taliba ajangshir, ta ashi.
NSF lenirisa, iba ama ya dang ora Naga lokti atema tarutsü putu malitsü, anungji state sorkari tekaraba nung iba tebilemtsü onük atema süoki ia inyakdaktsüner, ta mepishi.
Ano külen Directorate of School Education tenüng nung Accounts Officer, Tsuren Odyuo-i, dept-i parnok tsütsülen nungibo kecha memonotsü, saka maparen aser inyakyim karbo dept. aser state sorkaria meinyaktettsüsa lir, ta ashi.
Paisa, 2014 küm India sorkari lemzüktsüba itasenbo Feb. 2015 nung temogo, aser tesayurtem tebilemtsü pungbatsü atema state sorkari senpong nungi crore 14 aser lakh 15 agütsüogo, ta metetdaktsü.
Inyakyim dak sentakba nung pai, dept-i Feb 04 nü Accountant General nem utilization certificate agütsü, ibaji shitakba agibo March ita nungang agütsür. Audit certificate June 18 nü agütsü aser proposal ji India sorkar nem July 6 nü agütsüogo, ta ashi.
Ajisüaka tia makai CSS itasen atema inyaksangji transfer yoker liasü, aser tesüiba ita 5-6 tashi itasen atema achaayangtsü atema shinga maliasü, ibayongji Mizoram nunga ita 8 atema itasen magütsüi lir, ta paisa ashi.
Nov. 9 nü Centre nungi sanction order nguogo, aser tang tashi nung state account-i senji aita mali, anungji iba nung ya department mesüra state-i kecha mesüteter, ta paisa jangjatsüogo.
Lungkak aiter tesayurtem, NSF züngsemtem aser directorate ketdangsertem tsüngda mapang talangka o lemtepba sülen dept-i December 11 nü mesüra iba anogo matongdang itasen agütsütsü ta ashiba sülen ANAHTA-i lungkak aitba anenogo.