Dec 11 tashi nung mozüki lenmang meyanglura mokdangtsü : PYO

Mokokchung, Dec 8 (TYO): Dec 11 tashi nung department-i Mokokchung Police Point nungi civil hospital (IMDH) tashi lenmang raksar aliba tesemtem meyanglura Penli Youth Organization (PYO)-i iba lenmang mokdangtsü ta tanü PYO ketdangpurtemi yangi Imlong Place nung osangbenertem den jembidang metetdaktsüogo.
PYO ketdangpurtemi ashiba agi, tawa parnoki Urban Development department pur ketdangser ka ajurua Mokokchung town küm 125 ajungba tenüng nung police point nungi civil hospital tashi lenmang yanglushitsü (repairing asütsü) asoshi mepishia asüngdang, aji saka, dept-i ibaji “tang-tangbo makoktsü”, ta langzü.
“Onoki depatment dang ashibaji Penli lanurtemi nübu angati tenla agütsütsü aser department-i iba nungji nüngdakba teyari tera agüjang” ta mepishi, saka parnoki “tang-tangbo makoktsü” ta langzüba ka PYO ketdangpurisa ashi.
Iba lenmang ya Mokokchung district nungi dang masü saka kidanger district balala nungi shiranger (sickmen)-tem taneptsü aginüa aruba tongtibang lenmang ka lir, anungji, “ibai yanglutsü tang rongdak nüngdak maparen ka lir” ta PYO-isa ashi.
“Lenmang kanga majungdak talisa ongken tulu ir aliba tesemtem nung ali asüyonga yoka yanglutsü onok Penli lanurtemi nübu tenla agütsütsü mulunga lir”, ta parnokisa ashi.
Tang koba Penli Youth Organization ajanga Police Point – IMDH lenmang mokdangtsü lemtetogo, iba nungji Penli Ward Yimten aser Police Point – IMDH Taxi Union-ia iba telemtetba nungji nungiter, ta ward lennir aser Police Point-IMDH Taxi Union ketdangsertemisa metetdaktsü.