Dec 24 nungi Assam nung Food Security Act tenzüktsü

Guwahati, Dec. 20 (Agencies) : December 24, 2015 nungi Assam nung National Food Security Act mapa tenzüka amshitsü ta Chief Minister Tarun Gogoi-i Deobarnü metetdaktsü.
“Mapang shitak nung metenzüktet, saka state sorkari December 24 nungi National Food Security Act mapa tenzüktsü. Iba ajanga BPL aser APL kibongtem dena nütsüng yongsük crore 2.4 shi ajangzüktsü. Kechisarena nung jenjang atuba khuret nung nübortemi iba Act ajanga teyari tulu angutsü imlar” ta Gogoi-i osangbener senden ka nung ashi.
Iba mapatong inyaktsü atema Centre nung BJP-i aniba NDA sorkar nungi teyari shitak mangur, ta Gogoi-isa ashi.
National Food Security Act ya 2013 küm Congress-i aniba UPA sorkar mapang tenzükba lir. Food Security Act kübok jang seret ka indang jenjang teimtibaji sen 3 asütsü.
Centre-i Assam dak nungi Special Category State agienba Gogoi-i aitsü aser pai ashiba agi, iba ajanga state nung terenlok mapa inyakba nung tetsükdaktsü tulu ajurur.
“Mapa tasen tenzüktsübo yutsür, teinyakdak mapatem nunga tetsükdaktsü ajurur kechiyong Centre-i senotsü peria magütsür. Saka onoki iba anema noktaker aser Parliament nung lungkak aitba sentong agiba ajanga onok tejashi sayuogo” ta Assam chief minister-isa shisem.