Dec 3 nü Mkg nung state level ‘World Disability Day’ amungtsü

Mokokchung, Nov. 26 (TYO): District Election Office Mokokchung, Mokokchung District Blind Association, Mokokchung District Parents Association PwDs & DMA (SSA) den yaritepa department of Social Welfare aser Care & Support Society-i ayongzüka Dec 3 nü state level “World Disablity Day 2015” sentong yangi Mokokchung town hall nung amungtsü renemdagi.
Iba sentong nung State Disablity Commissioner (GoN) Dr. Atha Vizol aser department of Social Welfare (GoN) Director, T Merangtsüngba Aier na tongti tesemdanger aser tetushi tesemdanger asütsü jaoka lir. Taküm iba sentong ya “Inclusion Matters: Access and empowerment for people of all abilities” omen nung ajemdaker amungtsüba lir.
“Taküm balaka iba sentong ya tulu ka ayongzüka amungtsü tebilemba lir, anungji, sentong nung matamabensartem den parnok tsürabur aser tejangrartem ajak arua dendaktsüner” ta Mokokchung Care & Support Society (C&SS) Managing Director, Imchawati Kichu-i yangi C&SS office nung osangbener senden ka alidang metetdaktsü.
C&SS-i achayanga 2011 küm matamabensartem atema telok (Forum) ka tentetba den 2012 küm matamabensar tsüraburtem asoshia Mokokchung District Parents Association PwD tenzüka yutsü. Iba denji ano C&SS-isa 2012 küm Mokokchung District Blind Association tenzükja lokti ajungkettsü asoshi maparen balala inyaka arudagi.
Dec 3 nü kasa ‘World Disability Day’ den repsema matamabensartem atema award agütsüba national level sentong ka Delhi nung ayongzüka lir, iba nungji Mokokchung nungia Khensa tsür Kr. Katibenlai ‘Best Creative Child with Disablities’ senpet agizüktsü, ta C&SS ketdangseri ashi. “Matamabensar atema forum tenzükba takok süngjangji tang award agizükba ya ka asütsü” ta paisa ashi.
Central-i matamabensar jenjang ajungkettsü atema temzüng aser tetuyuba balala yanglua kar, iba dak ajemdaker state sorkaria parnok (disabilities) atema teinyaktsü sentongren tajung kar yanglua mapa küma inyaktsü tim ta Temsüwatiisa tebilemba ka lemsatep.
C&SS-i achayanga Ongpangkong tzükong kübok yim 8 nung aliba matamabensartem repranger, tang tashi nung item yim 8 nungi matamabensar züludena aoba ajak agi 190 shi lir. Parnok nemji anema alitsü (health), shisaliok (education), tepok sünga alitsü asoshi rongsen lenmang bushiba (livilihood), loktiliba aser tesayuba balala agüja arudaki. Iba dak alaka tanga yim nungia tedennertembo adentsü lenmang lapokja lir ta C&SS ketdangser kati ashi.
Parnokisa matamabensartem anepaluba mapang ajangshiba kar lemsatepdang, matamabensar karbo tsüraburtemia mimbangtsü meranger, ano parnok atema oli-aruli ta senzütsübaji tasak kechiyong parnok anepalutsü nübu talila nüngdaker, ano parnokji lokti nung kangarabo keta sena mamshir, aji oda, ano aika sensaker kibong nungi asünung oli-oratsü senotsü nung tetsükdakba ajurur ta ashi.
‘Matamabensar jenjang ajungkettsü asoshi lokti nung tangatetba nüngdaker aser sorkaria parnokji mesentoki kechi tangutsü tim lir, itemji agütsütsüla’ ta ketdangser kati shisem.