Dec. 30 tashi nung sen tejen khen dang melentsü akok

Kiyimba sentong atema sen lakh 2.5 agütsütsü akok

Mumbai, November 19 (Agencies): Reserve Bank of India (RBI)-i, December 30 nü tashi nung bank counters nung sen tejen khen dang melentettsü, ta metetdaktsü.
“Review senden ka nung bank tem nung SBNs (Specified Bank Notes) sen 2000 khen dang melentsütsü atema telemtetba agiogo,” ta RBI-i public, private banks, Regional Rural Banks, Urban aser State Cooperative Banks nung Chairman, Managing Director aser Chief Executive Officer ajak nem metetdaktsüogo.
Ajisüaka bank deposits atemabo telatetba mali.
Ano New Delhi nungisa tanga osang ka nung, taruba hopa nungi kiyimtsüpurtemi RBI lateta aliba nung ajemdaker bank nungi sen lakh 2.5 agizüktsü akok, ta metetdaktsü.
“RBI-i latetja alibatem nungji temsüa melira onoki kibong shia (kiyimsang aser kiyimla) naprong nem sen lakh 2.5 magutsütettsü. Onoki RBI nungi tetuyuba atadar,” ta Punjab National Bank Managing Director, Usha Ananthasubramanian-i ashi.
“Hombar tashi nungbo tetuyubatem angutsü onoki imlar, aser Mongolbarnü nungibo bank kongsangtemi kiyimtsü atema sen agütsü tenzüktsü imlar. Iba senji kibong akümer mesüra tsürabur napronglai agizüktettsü. Iba senji ka dangang melatsü. Sen lakh 2.5 ji tetsürlar aser tebursanger kibong naprongla nem agütsütsü,” ta laisa metetdaktsü.
RBI-i temelaba magütsüra tanga bank tem nungbo iba maongka mangutsü.