December 1 nungi PHED-i Water Metering tenzüktsü

Dimapur, September 4 (TYO) : September 4, 2015 nü PHED Nagaland Minister, Tokheho Yepthomi-i Department Secretary, Mrs. Anenla S. Longchari, IAS, Chief Engineer, Er Kevisekho Kruse aser Department  nung tongti ketdangsertem den senden ka agi.

Iba senden ya Cimorb Hotel, Kohima nung agi aser CSS Schemes, work charged employees, PHED ali atsünga agiba, district HQs aser ADC HQs nung water supply & revenue collection tajungba akümtsü aser ano tanga onüktem benoka lemsatep.

Tanü agiba senden nung December 1, 2015 nungi tenzüka Department-i water fee agiba inyakyim ka dang asütsü aser iba ya atema non metered connections ajak metered connections melentsü telemtetba agi.

Tang aliba water supply systems anepalutsü aser urban o revenue towns nung revenue collection atema field employees tajemba ayutsü atema Divisional Officers nem mapa nungloktsü.

Department nung ketdangser kari departmental pipes aser tanks nungertem tim mesüi amshiba osang lir aser tanü senden nung iba onük kanga tongti süa jembidang Minister Tokheho-i kümdangtsü olen ka ashi.

Tarutsü nung ketdangser kari ochimashi mapa inyakba putetra ozüng tapet agi merenshitsü, ta tanü senden nung Minister-isa metetdaktsü.

Senden nungsa Association of Public Health Engineers Nagaland-i takhangba agütsübatem atema jembidang PHED Nagaland Minister-i ashiba agi, tang Nagaland sorkar ket nung senotsü peria maliba agi timtemer.

Küm shia financial budget nung sorkar sen timbaka sorkar mapa inyaker itasen nung endoker aser nisung ajaki tebilemtsü khuret bena meinyakra asen Naga lokti liyonga aotsü asoshi tetsükdaktsü tulu ajurutsü, ta paisa ashi.