December 2022 nung Aquaman 2 sayatsü

Tsüklai/February 28 (Agencies): December 16, 2022 nü theatre tem nung taruba ‘Aquaman 2’ film sayatsü ternemba lir, ta Warner Bros.-i osang jangjatsüogo.
2018 box office nung takok anguba film kong Jason Momoa-i DC Comics superhero tongti shilem agiba nguogo, iba franchise nung installment tanabuba atema fans temi küm ana tashi arema atatsüla, ta Warner Bros-isa jangjatsüogo.
Aquaman film, koba sen timtiba aazükba film rongnung jenjang 21buba kümogo, iba sequel atema director tasen ka bushidar aser taoba film produce asüsang James Wan tanaben anioktsü, ta osangtem ajanga metetdaktsüogo.
David Leslie Johnson o McGoldrick nati Will Beall den longjema Aquaman movie mezüngbuba atema script züluja liasü aser par asempronglai ano tanaben project tasenba atema script zülu tenzükogo saka iba script dak sendakba otsüren metetdakja mali.
Iba franchise produce asütsü atema Wan den Peter Safran longjemtsü ta kasa osang ajanga metetdaktsü.
Momoa indang standalone movie ‘Aquaman’ ajanga box office nung takok tulu anguba sülen, Warner Bros.-i Trench nung ajemdaker film tasen ka yanglutsü atema bilemdar.
Aquaman spin-off atema Noah Gardner aser Aidan Fitzgerald naprongla nem script züludaktsütsü aser kasa mapang Wan o Safran nati iba project produce asütsü.
Iba movie nungbo ‘Aquaman’ film nung tongti shilem agitem talisa Nicole Kidman, Amber Heard, Willem Dafoe aser Patrick Wilson nunger shilem agiba mangütsü imlar.