December 30 sülen ano mera kar agitsü akok: Modi

New Delhi, November 12 (Agencies): Ochimashi sen kaktettsü atema ano mera kar agitsü olen ka nung tanü Ato kilonser, Narendra Modi-i, ochimashi sen rizünga alirtemji magizüktettsü aser December 30 nü sülen bo mera magitsü ta ni mashir, ta metetdaktsü.
Paisa, ochishirtemibo timtem majurutsü, ta ashi.
Ato kilonseri, “Ni ano maneni iba ya sangdonger- iba mapatong tembangba sülen nenok (ochimashirtem) merenshitsü atema mera magitsü ta ni mashir,” ta metetdaktsü.
Japan nung aliba India sensotem den jembidang Modi-i, “Ochimashi kar danga lira, ibaji nüjiso anguba mapang nungi tenzüka records bushitsü ta ni züngbong ashir. Iba atemaji nüngdak dang süra nisung aika nem mapa nungloktsütsü. Ochishirtemibo timtem kecha majurutsü. Ni meteta alirtemjia tekolok techira. Parnoki, bank nung inoktsü dang nungibo Ganga ayong nung ang tenla agütsü tajungba asütsü ta bilemer,” ta ashi.
Pai iba o ya, Ganga ayong nung sen 500 aser 1,000 note tejen intokba osang dak sentakba nung jembi.
“2011 küm Japan nung alimar lendong atalokba sülen parnoki (Japan) linük atema inyakba ama nüburtemi (India nunger) tarensen nung ghonda pezü, ghonda trok nokdaka liasü, saka linük atema iba telemtetba (sen melenba) agizük,” ta Modi-i ashi.
“Timtem kobasa ajangshitsü ta ni kanga talangka shisadangogo aser ibaji miimbanga meyutet. Ibaji ajungbena inyaktsüsa akum, ajisüaka iba ya ajanga temoatsü angutsü ta ni bilema maliasü,” ta paisa ashi.
“Ni India nunger shia dang pelar. Ozü kinüngertem kiyimba liasü, aser temang manemi aliba ajanga timtem ajangshiogo, ajisüaka parnokia iba telemtetba agizük,” ta paisa ashi.
Alima nung rongsenkettsüng tekaratiba ainba linükji India lir ta shia Modi-i, “IMF aser World Bank-i obang ka ser jembir. IMF-ia India ya petinu ka medem wangshir ta shiogo. Alima nung Economist temi India ya kanga kara ainer ta ashir,” ta Ato kilonserisa metetdaktsü.
Tesüiba küm ana tsüngda sorkari mera balala agia inyakba ajanga ochimashi sen lakh crore 1.25 kaktetogo, ta paisa shisem.