December tom nungi tenzüka mapang telatet makai lungkak aittsü:AIOCD

New Delhi, November 26 (Agencies): Sorkari e-pharmacy balala ajanga online nung mozü ayokba menokdangtetba ajanga All India Organisation of Chemists aser Druggists (AIOCD) nung züngsemtem December ita tom nungi tenzüka mapang telatet makai lungkak aittsü sentong lir, ta AIOCD ketdangsertemi Brihostibarnü metetdaktsogo.

Online ajanga mozü ayokba ya Drugs & Cosmetics Act, 1940 alema inyakba maparen lir aser iba ya nokdangtsü asoshi AIOCD-i sorkar nem ita ka mapang agütsür kecha mapa makümba ajanga parnoki lungkak aittsü lemtet.

“Onoki mapang ita ka agütsür ataogo saka sorkari online ajanga mozü ayokba menokdangtet anungji tanbo mapang telemtet makai lungkak aittsü,” ta AIOCD nung Tongti Tezülur Suresh Gupta-i ashi.

“Sorkar dang onoki online ajanga mozü ayokbaji nüburtem taküm asoshi lendong ta angateta shiogo kechiba süra doctor tetuyuba meli-i parnoki item mozü tapi-i alir, ajisüaka parnoki mangashi amai toktsü,” ta Gupta-i ashi.

Pai, “Onoki lateta yutsüba mapang, ita ka sülen health ministry aser Prime Minister Office dangi shidi züluogo, ajisüaka kecha telangzüba mali, anungji onoki mapang telatet makai lungkak aittsü telemtetba agi,” ta IANS dang ashi.

Kasa tebilemtsü nung sorkar nem temepishiba aika agütsüba melangzüba ajanga October 14, 2015 nü-a AIOCD-i kenü anogo piyong lungkak aitta liasü.

India rangben nung mozü ayokdak dokan lakh ti dak tema lir.

Gupta-i, “Onoki December mezüng hopta nung senden ka amentsü aser idangji lungkak aittsü anogo tejangja lemtettsü,” ta ashi.

“Tesüiba mapang lungkak aitdang sorkari onoki akhangba ataloktsütsü ta ashiba aser shiranger nüngdak ataloktsütsü meji mozü ayokba tesem karbo lapoka liasü ajisüaka tanbo linük nung aliba mozü ayokba dokan ka danga melapoktsü,” ta Gupta-isa ashi.