Deepak Jayakumar aser Sasikala nati Jayalalithaa tepsettsü merang: Deepa

Chennai, June 11 (Agencies): Taoba Tamil Nadu Chief Minister asür, Jayalalithaa’er adianu chir, Deepa Jayakumar-i, Deepak Jayakumar aser Sasikala nati sentong yanglua Jayalaltithaa tepsettsü merangogo, ta tanü metetdaktsü.
Tanep 10:00 ako meta Deepa aser la kinungbu, Madhavan nati Jayayalalithaa’er ki, Poes Garden residence agitsü atema aru, saka security sepaitemi parnok nokdanga liasü.
Deepa-i ashiba agi, VK Sasikala’er kinunger aser AIADMK Amma Deputy General Secretary TTV Dhinakaran atema inyakertemi la nokdang.
AIADMK Amma camp nungi osang ka ajanga ashiba agi, Deepa-i jelia sentong memetetdaktsüi ajungbena Poes Garden residence semdang aser tenü, Jayalalithaa noksa nung narozük azüktsünüa liasü.
Deepa-i kima aliba Jayalalitha noksa nungji naro azüktsü, iba sülen lai ki telungi tunüa liasü, saka la nem temelaba magütsü.
Iba mapang nungji Deepa’er adianu, Deepak Jayakumar-a kidangji liasü.
MGR Amma Deepa Peravai tentetsang Deepa-i, Jayalalithaa tepsetba atema la adianu, Deepak nem temerenshi agütsütsüla, ta ashi.
“Ni ki telungi mayaketdaktsü. Deepak Jayakumar-i Sasikala den adenba ajanga onok ashioktsür ama bilemer,” ta Deepa-i ashi.
“Pai-a (Deepak) Sasikala ama aibelena lir. Jayalalithaa hospital nung amungdang pai la (Sasikala) den senteper la tepsettsü merang. Parnoki sen atema ibaji inyak,” ta laisa metetdaktsü.
Jayalalithaa taküm alidang aliba ki, Poes Garden nung tang AIADMK general secretary VK Sasikala lidar.
Jayalalithaa-i la taküm alidang senmang atema kecha zülua medoktsü, ajisüaka lar adianu’er chirtem- Deepa aser Deepak nungeri ibaji senmangtsüla ta bilemer.