Deepika-i ‘Majhdhaar’ film nung Salman den shilem agitsü

Mumbai, April 18 (Agencies): Bollywood nung actress ajaki Salman Khan den film nung külemi shilem aginer. ‘Dabangg’ actor Khan den shilem aginer actress aika lir, aser parnok rongnung Deepika Padukone densema lir.

Bangalore nungi Deepika ya 2013 küm nungi Bollywood nung kanga nüngtugu akum. Taoba mapang lai ‘Piku’ film nung Amitabh Bachchan’er jala ama shilem kanga junga agia liasü. Iba den külemi lai ‘Tamasha’ aser ‘Bajirao Mastani’ film nunga shilem kanga junga agitetogo.

Salman Khan-i tongti shilem agitsü aliba Kabir Khan’er film ‘Majhdhaar’ nung Deepika-ia shilem agitsü, ta Bollywoodlife.com. osang ajanga ashi.

Ajisüaka iba film nung shilem agitsü tezüngzüktep magidangyongi Deepika-i Kabir dang iba film nung la nem shilem talangka agidaktsüner. Tetezü lai Salman Khan den film nungji tongti shilem aginer.

Tang Bollywood nung Mastani ta ajala Deepika Hollywood film ‘xXx: The Return Of Xander Cage’ tangokba nung kanga mazüngi lir. Iba film nung Vin Diesel-ia tongti shilem agir.