Deepika indang Chhapaak film Rajasthan nung saru magitsü

Aenjeti/January 12, 2020 (Agencies): Madhya Pradesh aser Chhattisgarh tsüngsü nung anidaka Congress-i yimsü asüba Rajasthan state nunga Deepika Padukone-i tongti shilem agiba Chhapaak film sayuba atema saru magitsü sangdongogo. Rajasthan nung Meghna Gulzaar direct asüba film dang saru magitsü asoshi Hokolbarnü telemtetba agi.
Mongolbarnü Madhya Pradesh aser Chhattisgarh (state anaprongla Congress-i yimsü asür) na nung Hokolbarnü film mesaya tsüngda iba film dang saru magitsü asoshi sangdongadoker liasü.
“Chhapaak film sayaba atema saru magitsü telemtetba agiba pelashishia sangdonger. Iba film sayaba atema saru magitsü asoshi telemtetba agiba nüburtemi pelashishia agizükogo. Iba film ajanga nüburtem aika tenük lapoktsütsü,” ta Rajasthan Chief Minister Ashok Gehlot-i Honibarnü ashi.
Iba film ya acid agi amakba nungi jenbor alila Laxmi Agarwal indang taküm otsü nung ajemdaker yanglu. Film nung maneni Vikrant Massey-ia tongti shilem agir. Deepika Padukone-i tang mezüngbuba producer ka ama Chhapaak film produce süogo.
Tawa Twitter nung nisung aikati Deepika anema arudar shirnoki #BoycottChhapaak tenzüker arudar. Lai Jawaharlal Nehru University semdanga, January 5 nü samesa nisungtemi tashiyim benshia züka merenshiba kaketshirtem den tejashi lemsatepba sülen la anem tenzük.
Iba sülen BJP otongdar Tajinder Pal Singh Bagga-i Deepika indang noksa ka tweet asüba den la indang film boycott asütsü asoshi ayongzük. Nüburtem aikati Chhapaak film reprangtsü asoshi ticket thitsüba indang noksa lemsatep saka noksa ajak ya kasa dang liasü.
Kasa mapang nung nüburtem aikati Deepika pusemogo. Madhya Pradesh sorkari iba film sayaba atema saru magitsü sangdongba dang masü parnoki la nem taruba IIFA awards Bhopal nung agiba mapang tetushi agütsütsü sangdong.