Deepika Padukone aser Ranbir Kapoor nati Mijwan atema longjemer

Mumbai, Rongchii (April) 14 (Agencies): Taoba mapang nüknüratepa aliba Ranbir Kapoor aser Deepika Padukone nati Mijwan Fashion Show nung külemi shilem agitsü.
‘Tamasha’ film nung shilem agir Ranbir aser Deepika nati Rongchii (April) 19 nü iba sentong nung shilem agitsü.
Rongchii (April) 9 nü tenati Mijwan Fashion Show nung shilem agitsü ta osang ka sangdonga liasü saka Deepika tekong nung timtem ka adokba den Ranbir typhoid agi shirangba ajanga sentongji athi.
“Rongchii (April) 9 nü Mumbai nung aliba Grand Hyatt nung Mijwan Fashion Show alitsü aliba hopta ka shi atema thinena atar ta onok kanga dang sasa metetdaktsür. Iba sentong nung tongti shilem agir Ranbir Kapoor aser Deepika Padukone na temang nung timtem kar adokba ajanga iba sentong thinentsüsa akümer. Onoki anogo tasen ka lemtetba sülen osang metetdaktsütsü. Koda masüba khuret atema tatok meshir aser nenoki aremzüka atatsü imlar” ta tayongertemi sangdong ka nung metetdaktsü.
Designer Manish Malhotra-ia pa indang Instagram account nung Ranbir aser Deepika nati shilem agitsüba osang metetdakja liasü.
“Mijwan Fashion Show. Mijwan tenzüker küm 9- Ranbir Kapoor den topur tajung Deepika Padukone na külemi Mijwan nung shilem agitsü” ta Manish-i zülu.
NGO Mijwan Welfare Society ya Uttar Pradesh nung yimtsüng ka nüngtem nung aja aser iba ya Shabana Azmi tebu aser sangro mejemer asür Kaifi Azmi-i tenzükba lir.
Chikankari embroidery amshiba ajungkettsü aser iba dak sendakba nung tetsürtem nem mapa agütsütsü nükjidong nung iba NGO ya tentet.
Tang iba NGO ya Shabana-i Naresh Goyal’er jala Namrata den yaritepa ketdangsür.
Yaküm Anushka Sharma aser Shah Rukh Khan nati iba sentong nung shilem agia liasü.
Bollywood nung mapang ka Ranbir aser Deepika na meimtepdang nisungtemi kanga sapua jembi. Tena pilaba sülen-a nisungtemi tena kanga sapua liasü aser tena pilaka tenati tesentaktep tajung ayu aser ‘Yeh Jawani Hai Deewani’ o ‘Tamasha’ film tem nung külemi shilem agi.
Deepika-i taküm küm tatemlen Ranveer Singh den kibong akümtsü ta osang kar jembidar.