Deepika Padukone-i film tasaktiba nung shilem agir

Gurgaon, October 18 (Agencies): Sanjay Leela Bhansali-i direct asüba ‘Bajirao Mastani’ film nung Ranveer Singh-i Maratha lennir Peshwa Bajirao ama shilem agir, Deepika Padukone-i pa (Peshwa) nokinketer Chubatsür Mastani aser Priyanka Chopra-i pa mezüng kinüngtsü Kashibai amai shilem agir.
Iba film otsü ya Peshwa aser pa tanabuba kinüngtsü Mastani na meimtepa nung ajemdaker yanglu.
Lai film nung shilem agia aruba rongnung shilem tasaktiba agibaji ‘Bajirao Mastani’ film nung lir ta Deepika-isa ashi.
“Iba film ya tasaktiba lir. Iba film ajanga tekolok, temang aser shisatsü nung kanga belemer. Film aser director nati aginütsüsa inyaktsübaji kanga tasak” ta Deepika-isa ashi.
Bhansali-isa Deepika aser Ranveer na 2013 küm ‘Goliyon Ki Rasleela Ram Leela’ film nung direct süogo.
Deepika-i ashiba agi, “Bhansali-i kodanga pai anguba nung temulung masür. Pai actor tem aser par telok dang nungi tajungtiba aginür. Aji agi pai nü dak keta lir ta mebilemba sempet ajak metetdakja inyakdaktsür.”
“Pa ya tesayur tesashi ka lir aser pa den külemi inyaksemdang nai memetetba aika angazüker. Ni asoshi iba film nung shilem agiba ya tasaktiba lir, saka tatem nungbo iba jenjang metettsü” ta laisa shisem.
Bajirao Mastani film ya December 18, 2015 nü sayatsü sentong lir.